काठमाडौं । नेपाली कांग्रेसका वरिष्ठ नेता गोपालमान श्रेष्ठको निधन भएको छ । श्रेष्ठको मंगलबार दिउँसो निधन भएको नेपाली कांग्रेसका महामन्त्री प्रदीप पौडेलले बताए । केही समयअघि अस्पतालले मृत्यु भएको घोषणा गरेको पौडेलले जानकारी दिए । लामो समयदेखि बिरामी रहेका श्रेष्ठको उपचार चलिरहेको थियो।
मंगलबार ललितपुरको हेलियस अस्पतालमा उपचारका क्रममा निधन भएको हो । श्रेष्ठको पार्थिव शरीरलाई श्रद्धाञ्जलीका लागि बुधबार बिहान सानेपास्थित नेपाली कांग्रेसको केन्द्रीय कार्यालय राखिने भएको छ । त्यसपछि शवयात्रासहित पशुपति आर्यघाटमा अन्त्येष्टि गरिने जनाइएको छ । ८३ वर्षीय श्रेष्ठ पूर्वमन्त्री पनि हुन्। उपप्रधानमन्त्रीसमेत बनेका उनी शिक्षा, वन तथा भूसंरक्षण, उद्योग र भौतिक योजना तथा निर्माणमन्त्री पनि बनेका थिए ।
२०१७ सालदेखि विद्यार्थी राजनीतिमा सक्रिय भएका उनी २०३६ सालको जनमतसंग्रह, २०४६ सालको जनआन्दोलन र २०६२–६३ सालको दोस्रो जनआन्दोलनमा सक्रिय सहभागी भएका थिए । अर्थशास्त्रमा स्नातक गरेका श्रेष्ठ राजनीतिमा सक्रिय बनेपछि सामाजिक कार्यक्रममा पनि संलग्न हुँदै आएका थिए ।
उनी नेपाल रेडक्रसलगायतका सामाजिक संस्थामा आवद्ध थिए । केही दिनअघि मात्रै उनलाई कांग्रेसले वरिष्ठ नेता बनाएको थियो । उनी कांग्रेसका उपसभापति पनि भएका थिए । श्रेष्ठका तीन छोरा र ६ छोरी छन् ।
