भैरहवा। क्षेत्री समाज नेपाल, सिद्धार्थनगर भैरहवाले घटस्थापनाको अवसरमा ¥याली तथा अन्तरक्रिया कार्यक्रम गरी क्षेत्री दिवस मनाएको छ। समाजले क्षेत्री समुदायको ऐतिहासिक पहिचान, मौलिक संस्कृति, परम्परा र सामाजिक एकताको संरक्षण गर्ने उद्देश्यले दिवस मनाएको हो।
क्षेत्री समाज सिद्धार्थनगरको आयोजनामा भैरहवास्थित लुम्बिनी रोडबाट सुरु भएको ¥याली बरमेलिटोल र नारायणस्थान हुँदै बैंक कलोनीस्थित दुर्गा मन्दिरमा पुगेर समापन भएको थियो। ¥यालीपछि मन्दिरमा पूजापाठ तथा अन्तरक्रिया कार्यक्रम गरिएको थियो।
क्षेत्री समाजका अगुवा शेरजंगबहादुर बस्नेतले घटस्थापनालाई स्थापना दिवसका रूपमा मनाउनुको उद्देश्य दसैँको सुरुवातसँगै क्षेत्री समुदायको ऐतिहासिक पहिचान, संस्कृति र सामाजिक एकतालाई उत्सवका रूपमा स्थापित गर्नु रहेको बताए।
क्षेत्री समाज सिद्धार्थनगरका अध्यक्ष राजेन्द्र थापाले भैरहवा नगरमा छरिएर रहेका क्षेत्री समुदायका सदस्यलाई एकीकृत गर्दै परम्परागत पोसाकसहित नगर परिक्रमा, पूजापाठ र अन्तरक्रियामार्फत दिवस मनाइएको जानकारी दिए।
¥यालीमा पुरुषहरू दौरा–सुरुवाल, कोट, पटुका र ढाकाटोपीमा सजिएका थिए भने महिलाहरू गुन्यू–चोली तथा तिलहरी, नौगेडी र पोतेलगायत परम्परागत गरगहनामा सजिएका थिए। सहभागीले एक हातमा राष्ट्रिय झन्डा र अर्को हातमा क्षेत्री समाजको झन्डा बोकेका थिए। परम्परागत पोसाकमा सजिएका सहभागीको ¥यालीले स्थानीयको ध्यान आकर्षित गरेको थियो।
समाजका पूर्वअध्यक्ष मिलन बस्नेतले नेपालको आधुनिक इतिहास, राजनीतिक परिवर्तन तथा सामाजिक आन्दोलनमा क्षेत्री समुदायले योगदान दिएको उल्लेख गर्दै समुदायको संस्कृति र परम्पराको संरक्षणका लागि दिवस मनाइएको बताए।
क्षेत्री समुदायको इतिहास र संस्कृति नेपालको सामाजिक तथा सांस्कृतिक विविधतासँग जोडिएको छ। थापा, बस्नेत, पाण्डे, कुँवर, खड्का, कार्की, भण्डारी र अधिकारीलगायत विभिन्न थर यस समुदायमा प्रचलित छन्।
राष्ट्रिय जनगणना २०७८ अनुसार क्षेत्री नेपालमा सबैभन्दा बढी जनसङ्ख्या भएको जाति हो। जनगणनाअनुसार कुल जनसङ्ख्याको १६.४५ प्रतिशत क्षेत्री समुदायको हिस्सा रहेको छ।
