बुटवल, ४ असार ।
बुटवल उपमहानगरपालिकाका विभिन्न टोलमा बसोबास गर्ने सुत्केरी महिलाहरूलाई पोषण सामग्री वितरण गरिएको छ । आमा तथा नवजात शिशुको स्वास्थ्य अवस्थामा सुधार ल्याउने उद्देश्यका साथ सुत्केरी महिलाहरूलाई पोषणयुक्त खाद्य सामग्री प्रदान गरिएको हो ।
बुटवल उपमहानगरपालिका वडा नं ५ को कार्यालयले वडाका विभिन्न टोलमा रहेका ४५ जना सुत्केरीहरुलाई एक कार्यक्रमका बिच सामग्री वितरण गरेको छ । शहरी स्वस्थ्य केन्द्रमा नियमित स्वास्थ्य परिक्षण गरेका र महिला स्वास्थ्य स्वयंमसेविकाद्घारा सिफारिस गरिएको सुत्केरीहरुलाई अण्डा, हर्लिक्सका साथै सुत्केरी पुवाका परिकार समेत वितरण गरिएको वडाअध्यक्ष हरि प्रसाद श्रेष्ठले बताए । सुत्केरी अवस्थामै पर्याप्त पोषणको आवश्यकता, स्तनपानको महत्व तथा आमा–शिशु स्वास्थ्यसम्बन्धी सचेतना समेत प्रदान गरिएको उनले बताए ।
यसैगरि वडाकै सौभाग्य टोलका अपाङता भएका दुई जनालाई ह्वीलचेयर समेत हस्तान्तरण गरिएको छ । आर्थिक अवस्था कमजोर भएको साथै हिडडुलल गर्न कठिनाई भएका तारा थापा र खग सुनारलाई ह्विलचेयर वितरण गरिएको हो । करीब १९ हजार मुल्य बराबरको ह्वीलचेयर पाएपछि दुबै जना भावुक बनेका थिए ।
