बुटवल,१३ असोज ।
बुटवल–११ टप मजुवामा विपद्का कारण पूर्ण तथा आंशिक क्षति भएका घरपरिवारलाई बुटवल उपमहानगरपालिकाले तत्काल राहत उपलब्ध गराउने भएको छ । बुटवल उपमहानगरपालिकाको विपद् व्यवस्थापन समितिको आज बसेको बैठकले पूर्ण क्षति भएका तीन घर र आधा क्षति भएका दुई घरलाई मासिक १५ हजार रुपैयाँका दरले तीन महिनासम्म राहत उपलब्ध गराउने निर्णय गरेको हो ।
नगर प्रमुख खेलराज पाण्डेले विपद्बाट प्रभावित परिवारलाई तत्काल राहत तथा आवश्यक सहयोग उपलब्ध गराउनु स्थानीय सरकारको प्राथमिकता भएको बताउँदै जोखिम न्यूनीकरणका लागि सम्बन्धित निकायसँग समन्वय गरेर काम अघि बढाइने बताए । यस्तै, टप मजुवा क्षेत्रमा पक्की ढलान गरिएको पर्खाल निर्माणको काम छिटोभन्दा छिटो अघि बढाउन जनताको तटबन्ध कार्यालयलाई अनुरोध गर्ने निर्णय बैठकले गरेको छ।
जोखिमयुक्त क्षेत्रमा थप क्षति हुन नदिन आवश्यक संरचना निर्माण तथा व्यवस्थापनलाई प्राथमिकतामा राखिने जनाइएको छ । बैठकले विपद्का समयमा उद्धार, राहत तथा व्यवस्थापनमा खटिएका सुरक्षा निकाय, जनप्रतिनिधि, टोल समिति, नागरिक समाज, सञ्चारकर्मी तथा बुटवल उपमहानगरपालिकाको विपद् शाखालाई धन्यवाद व्यक्त गरेको छ ।
