रूपन्देही । लुम्बिनी प्रदेशका पूर्वाधार विकासमन्त्री सुनिल लम्सालले रूपन्देहीको मर्चवार क्षेत्रको पूर्वाधार विकासलाई प्राथमिकताका साथ अघि बढाउने प्रतिबद्धता जनाएका छन् । सडक, स्वास्थ्य र शिक्षाका क्षेत्रमा आवश्यक योजना बनाएर बजेट व्यवस्थापन गरिने उनले बताएका हुन् ।
सोमबार मर्चवार क्षेत्रको स्थलगत अनुगमन तथा निरीक्षणका क्रममा मन्त्री लम्सालले चार लेन सडक विस्तार, ग्रामीण सडक निर्माण, अस्पताल स्थापना तथा स्वास्थ्य चौकी र विद्यालयको स्तरोन्नतिका लागि आवश्यक प्रक्रिया अघि बढाइने जानकारी दिए ।
मन्त्री लम्सालका अनुसार चालु आर्थिक वर्षमा दुई खण्डमा सडक विस्तारको योजना अघि बढाइएको छ । पहिलो खण्डको पाँच किलोमिटर सडकको विस्तृत परियोजना प्रतिवेदन (डीपीआर) तयार भइसकेको छ । उक्त सडक निर्माणका लागि तत्काल बोलपत्र आह्वान गर्ने प्रक्रिया अघि बढाइने उनले बताए ।
पहिलो खण्डकै थप १५ किलोमिटर सडकको डीपीआर तयार गरी निर्माण प्रक्रिया अघि बढाउने तयारी रहेको उनले जानकारी दिए । दोस्रो खण्डमा केही ढिलाइ भए पनि चालु आर्थिक वर्षको अन्त्यसम्म बोलपत्र आह्वान गर्ने योजना रहेको मन्त्री लम्सालको भनाइ छ ।
सडक विस्तारले स्थानीयको आवागमन सहज बनाउनुका साथै कृषि उत्पादनको बजारीकरण, व्यापारिक गतिविधि र आर्थिक विकासमा सहयोग पुग्ने अपेक्षा गरिएको छ ।
मर्चवारको धार्मिक तथा पर्यटकीय सम्भावनालाई ध्यानमा राख्दै मर्चवारी माई मन्दिरसम्म पुग्ने सडक निर्माणलाई पनि प्राथमिकता दिइने मन्त्री लम्सालले बताए । मन्दिरसम्म पुग्ने बाटो तथा त्यसलाई मुख्य सडकसँग जोड्ने सडक चालु आर्थिक वर्षभित्र निर्माण गर्ने योजना रहेको उनले जानकारी दिए । मुख्य तथा ग्रामीण सडकको निर्माण र स्तरोन्नतिका लागि समेत बजेट व्यवस्थापन गरिने उनले बताए ।
अनुगमनका क्रममा स्थानीयवासीले सर्पदंश उपचार सेवासहितको अस्पताल स्थापना गर्न माग गरेका थिए । त्यसपछि मन्त्री लम्सालले आगामी आर्थिक वर्षको बजेटमा आवश्यक व्यवस्था गर्ने प्रतिबद्धता जनाए । स्थानीयस्तरमै अस्पताल स्थापना गर्न सके स्वास्थ्य उपचारका लागि टाढा जानुपर्ने बाध्यता कम हुने उल्लेख गर्दै उनले स्वास्थ्य चौकीको स्तरोन्नतिलाई पनि प्राथमिकतामा राखिने बताए ।
त्यसैगरी, क्षेत्रका विद्यालयको भौतिक पूर्वाधार सुधारका लागि चालु आर्थिक वर्षमा आवश्यक योजनाको डीपीआर तयार गरी आगामी आर्थिक वर्षमा बजेट व्यवस्थापन गरेर कार्यान्वयनमा लैजाने तयारी रहेको उनले जानकारी दिए ।
मर्चवार क्षेत्रका विकासका आवश्यकता पहिचान गरी प्राथमिकताका आधारमा योजना अघि बढाउन स्थलगत अनुगमन गरिएको सांसद कन्हैया बनियाले बताए । अनुगमनका क्रममा स्थानीयवासीले उठाएका माग र समस्याको अध्ययन गरी सडक, स्वास्थ्य तथा शिक्षासम्बन्धी योजनालाई कार्यान्वयनमा लैजानुपर्ने उनको भनाइ छ ।
