बुटवल, जेठ १८ । लखन ब्रदर्श युथ क्लब, बुटवल–८, रुपन्देहीले बि भि एस नेपाल सँगको संयुक्त आयोजनामा जलन सम्बन्धी युवा अभिमुखीकरण तथा समुदायस्तरीय सचेतना कार्यक्रम सम्पन्न गरेको छ ।
कार्यक्रममा बि भि एस नेपाल का फिल्ड म्यानेजर निर्मल न्यौपाने र फिजिसियन डा. गोकुल पौडेलले जलनबाट बच्ने उपाय, प्राथमिक उपचार, उपचार प्रक्रिया तथा पुनस्र्थापना सम्बन्धी जानकारीमूलक प्रशिक्षण प्रदान गरेका थिए । कार्यक्रममा बोल्दै क्लबका अध्यक्ष सुदीप खत्रीले यस्ता सचेतनामूलक कार्यक्रमलाई बुटवल उपमहानगरपालिकाका सबै वडा तथा सामुदायिक विद्यालयसम्म विस्तार गर्ने योजना रहेको जानकारी दिए ।
त्यसैगरी, बि भि एस नेपाल का प्रतिनिधिले आर्थिक अवस्था कमजोर भई जलनबाट प्रभावित भएका व्यक्तिहरूको उपचार तथा पुनस्र्थापनामा संस्थाले लखन ब्रदर्श युथ क्लबसँग सहकार्य गर्दै आएको जानकारी गराए। बुटवल उपमहानगरपालिका वडा नं. ८ मा आयोजित कार्यक्रम क्लबका अध्यक्ष सुदीप खत्री को अध्यक्षतामा तथा वडा नं. ८ का वडाध्यक्ष यज्ञप्रसाद पंगेनी को प्रमुख आतिथ्यतामा सम्पन्न भएको हो। कार्यक्रममा स्वास्थ्य स्वयंसेविका, विभिन्न आमा समूहका प्रतिनिधि, क्लबका पदाधिकारी तथा सदस्यहरूको उल्लेख्य सहभागिता रहेको थियो।
