काठमाडौँ । देशभर मनसुनी वायुको प्रभाव रहेकाले आज कोशी, बागमती, गण्डकी र लुम्बिनी प्रदेशका पहाडी भू–भागका केही स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ। कोशी, बागमती र गण्डकीसहित विभिन्न प्रदेशका केही स्थानमा मेघगर्जन र चट्याङसहित हल्कादेखि मध्यम वर्षा हुन सक्नेछ।
महाशाखाका अनुसार उत्तर अन्डमान सागर तथा आसपास बनेको न्यून चापीय क्षेत्र आगामी दिनमा थप बलियो बन्दै पश्चिम–उत्तरपश्चिमतर्फ सर्ने सम्भावना छ। हाल कोशी र बागमतीका अधिकांश भू–भाग तथा गण्डकी, लुम्बिनी, कर्णाली र सुदूरपश्चिमका हिमाली क्षेत्रमा बदली रहेको छ।
आज राति पनि कोशी, बागमती र गण्डकीका पहाडी तथा हिमाली क्षेत्रमा वर्षाको सम्भावना छ। वर्षासँगै चट्याङको जोखिम रहेकाले आवश्यक सतर्कता अपनाउन महाशाखाले आग्रह गरेको छ।
