Spread the love

बुटवल ,५ मंसिर ।

संस्थागत विकास, व्यावसायिक हकहित र औद्योगिक तथा आर्थिक विकासका अनुभव आदानप्रदान गर्ने उद्देश्यले बुटवल उद्योग वाणिज्य संघ, रुपन्देही र दोलखा उद्योग वाणिज्य संघबीच छलफल भएको छ । बुटवल उद्योग वाणिज्य संघमा आएको दोलखा उद्योग वाणिज्य संघको भ्रमण टोलीलाई स्वागत गर्दै आयोजित कार्यक्रममा दुवै जिल्लाबीच औद्योगिक तथा व्यावसायिक साझेदारीका सम्भावनाबारे पनि छलफल गरिएको थियो ।

कार्यक्रममा बुटवल उद्योग वाणिज्य संघका अध्यक्ष नरिश्वर शर्मा पौडेलले संघलाई भ्रमणको गन्तव्यका रूपमा छनोट गरेकोमा खुसी व्यक्त गर्दै संघको स्थापना, संस्थागत विकास र सामाजिक क्षेत्रमा पु¥याएको योगदानबारे जानकारी गराए ।
उनले २००९ सालमा तदर्थ समिति गठन भई २०१० सालमा स्थापना भएको बुटवल उद्योग वाणिज्य संघले सुरुवातदेखि नै व्यवसायीको हकहित संरक्षणसँगै यस क्षेत्रको औद्योगिक, व्यावसायिक, आर्थिक, सामाजिक, शैक्षिक तथा स्वास्थ्य क्षेत्रको विकासमा योगदान गर्दै आएको बताए ।

दोलखा उद्योग वाणिज्य संघका अध्यक्ष सनत थापाले संस्थागत विकास र कार्यसम्पादनका अनुभव सिक्ने उद्देश्यले भ्रमणमा आएको बताए । उनले दोलखामा पर्यटन, जलविद्युत्, कृषि लगायतका उत्पादनमा सम्भावना रहेको जानकारी गराउँदै मुख्य रुपमा किवि तथा परम्परागत खाद्यान्न बालीको उत्पादन र प्रवद्र्धनमा समेत जोड दिए । काठमाडौँ र चीनबीचको दूरी घटाउने उद्देश्यले दोलखाबाट नाका सञ्चालनका लागि पहल भइरहेको र सडकको ट्र्याक खोल्न अब करिब पाँच किलोमिटर मात्र बाँकी रहेको उनले बताए ।

कार्यक्रममा बुटवल उद्योग वाणिज्य संघका निवर्तमान अध्यक्ष तथा नेपाल उद्योग वाणिज्य महासंघका कार्यकारिणी सदस्य हरिप्रसाद अर्यालले औद्योगिक तथा व्यावसायिक विकासका लागि व्यवसायीबीच एकता र सहकार्य आवश्यक रहेको बताए । कार्यक्रममा दोलखा उद्योग वाणिज्य संघका सल्लाहकार तथा पूर्वअध्यक्ष रामेश्वर मानन्धर, बुटवल उद्योग वाणिज्य संघका वरिष्ठ उपाध्यक्ष सुरज भट्टराई र महासचिव वसन्त ढकाललगायतले दुई संघबीच अनुभव आदानप्रदान र सहकार्यको आवश्यकता औँल्याएका थिए ।
छलफलमा व्यवसायीले भोगिरहेका समस्या, तिनको समाधानका प्रयास, संघको संस्थागत सुदृढीकरण तथा दुवै जिल्लाबीच हुन सक्ने औद्योगिक र व्यावसायिक साझेदारीका विषय उठाइएको थियो ।

 

 

">
Bajaj Grand Exchange Mela